تعمل إيه وقت الحرب؟
تعمل إيه وقت الحرب؟🤔‼️
وقت الحرب الأصوات بتعلي… الأخبار بتخوف… القلوب بتضطرب…
بس المؤمن له ملجأ واحد لا يهتز ولا ينهار: الله جل جلاله.
الحرب مش أول مرة تحصل في الدنيا، لكن الثبات دايمًا كان سلاح أهل الإيمان.
ربنا قال: {قُل لَّن يُصِيبَنَا إِلَّا مَا كَتَبَ اللَّهُ لَنَا}
يعني مفيش رصاصة، ولا قذيفة، ولا قرار دولة… يخرج عن قدر الله.
تعمل إيه بقى؟
جدّد توحيدك
قول من قلبك: لا ملجأ ولا منجى منك إلا إليك.
افتكر إن النصر بيد الله، والأمن بيد الله، والحياة والموت بيد الله.
الزم الدعاء
الدعاء سلاح لا يُهزم.
ارفع إيدك في جوف الليل، بين الأذان والإقامة، في السجود…
قول:
اللهم احفظ بلاد المسلمين، اللهم اكفنا شر الحروب، اللهم إنا نجعلك في نحورهم ونعوذ بك من شرورهم اللهم أهلك الظالمين بالظالمين.
اثبت وما تضعفش
الخوف طبيعي… لكن اليأس مش من شيم المؤمنين.
ربنا قال: {وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ}
ابعد عن الشائعات
مش كل خبر يتقال يتصدق.
في وقت الفتن، الكلمة ممكن تبقى أخطر من السلاح فأمسك عليك لسانك .
ارجع لربك بصدق
يمكن ما يحدث الان دي رسالة… من رب العالمين لإيقاظ قلوب غفلت.
الصلاة في وقتها، قرآنك، استغفارك، صدقتك… دي دروع حقيقية.
وإوعى الحرب تشغلك عن رمضان
لو إحنا في موسم الطاعة، يبقى ده وقت العتق من النار، وقت التوبة الصادقة، وقت القيام والقرآن.
اللي بيحصل حوالينا ما يمنعكش من صيامك بإخلاص، وقيامك بخشوع، ودعائك بحرقة.
يمكن لحظة سجود صادقة تغيّر أقدار… ويمكن دمعة في الليل تكون سبب نجاة.
الحرب بتكشف معادن الناس…
في ناس تتعلق بالأسباب بس، وناس تتعلق برب الأسباب.
خلّي قلبك مع الله…
اللهم سلّم بلاد المسلمين … اللهم احفظ بلاد المسلمين … اللهم اجعلنا من أهل التوحيد الصادقين في الشدة قبل الرخاء، ومن عتقائك من النار في هذا الشهر الكريم🤲🏼.
تعليقات
إرسال تعليق